You are here

Qué ye'l Conceyu Abiertu

Logotipu del Conceyu Abiertu.El Llar Solidariu nació en 1996 de resultes de la collaboración de delles organizaciones: COSAL, SOS Racismu, XEGA y la Xunta pola Defensa de la Llingua Asturiana, que dende diba tiempu veníemos coincidiendo nos mesmos sitios al llevar alantre el nuesu activismu sociopolíticu.

Güei formen parte del Llar Solidariu SOS Racismu, XEGA y la Xunta pola Defensa de la Llingua Asturiana.

La idea base del proyectu consistía n'iguar un espaciu común onde pudiéremos coinvivir y sofitanos unos a otros persones de delles procedencies y sensibilidaes sociales col envís de que fora dalgo más que los cuatro colectivos fundadores.

En tou esti tiempu vimos claro que defendemos valores d'igualdá, de solidaridá, de llibertá, de xusticia y de paz, que son tresversales tanto a les nueses organizaciones como a otros movimientos sociales. La guerra, la violencia contra les muyeres, el racismu cotidiano, la esclusión social, el porvenir ecolóxicu, les llingües y cultures amenazaes (sobremanera la llingua asturiana), la solidaridá internacional, amás de la llucha pola igualdá de derechos pa gais, lesbianes, bisexuales y tresexuales, son aspectos sobre los que queremos conocer más fondamente y intercambiar idees.

Precisamente por eso abrimos agora esti espaciu nuevu, Conceyu Abiertu, a toles persones y organizaciones que compartan estes inquietúes, que tean en desalcuerdu con esta sociedá onde la competencia apodera a la solidaridá, y el cultu al dineru y al ésitu son el valor cimeru, y convidámoslos a que vaigan a les actividaes que se programen.

Tamién queremos poner esti espaciu y los sos recursos a disposición de les persones y grupos que lu necesiten, tanto pa xuntes, talleres, charles, como pa manifestaciones culturales y artístiques de toles menes: Presentaciones de llibros, proyecciones de vídeos y películes, esposiciones, recitales y comentarios lliterarios, con un interés particular na xente qu'empieza, nes propuestes de la xente más mozo...